لما مجتمع بأكمله يجتمع على فعل شئ معين وحد قرر يخرج عن الضمير الجمعى أو الوعى الجماعى ده بيواجه مشكلات عديدة فمثلا مجتمع معتمد على اللحوم في وجباته الأساسية وتقرر انك تعتمد على النبات فقط أى كان أسباب قرارتك فبتواجة صعوبات فالموضوع ده رصد بسيط لبعض المشاكل مش كلها لو قررت انك تأكل النباتات في مجتمع يفضل أكل لحوم الحيوانات
1- هناكل أيه ؟
تقريبا ده السؤال اليومى والحيرة الدائمة بتاعت كل يوم ياترى هناكل ايه انهارده؟! تخيل بقى الشخص النباتى اللى أختيارته بقت محدودة أكتر هيعمل أيه مجرد التفكير بس ممكن يرهقه ويتمنى أنه لو كان ينفع يعيش من غير أكل هيكون أفضل , وطبعا ده مش من قلة النباتات أكيد, ولكن لانه بيعيش في مجتمع بيعتمد كليا على أكل اللحوم ونادرا لو لقيت مطعم بيقوم بأعداد وجبات كثيرة وشهية من الخضار فقط , الأ لو سلطة أو خضار سوتيه ,ولوقررت انك تاكل في البيت مفيش بيت مصرى تقريبا بيطبخ من غير لحوم ولو حصل بيبقى حدث وكل أفراد الأسرة تسأل هو فين الأكل!هاه فين الأكل! ده غير انو بيكون معمول أصلا من شوربة اللحمة اللى هو برضه مش هتعرف تاكله,وفى الحالة ديه مقدامكش غير حل وحيد انك تتعلم تطبخ وتعمل أكلاتك بنفسك ويبقى ديما معاك في الشنطة وانت خارج خضار وفاكهة, ولو صعب عليك تشيل أكل معاك وانت نازل عندك حل لطيف محلات الفول والفلافل ده تقريبا المكان الوحيد اللى مفيهوش أى لحوم.
2-وداعا للديلفرى
الناس اللى عايشة لوحدها و بتحب التيك اواى ومعاها كل تيلفونات المطاعم دول أكتر ناس هيزعلوا مفيش (ديلفرى نباتى) للأسف ,طب عايز أفطر ومستعجل وعايز أروح الشغل ياترى هفطر ايه كوسة؟!
3-ماما عايزة أكل:
هنا بقى المشكلة الأكبر على الأطلاق اللى عندهم أطفال هيعملوا ايه هيخلوهم نباتيين زايهم ازاى؟ هيقدروا يقنعوهم بفكرتهم ولاهتيهزموا قصاد كل أغراءات اللحوم اللى حواليهم في كل مكان ولا قاعدة(الممنوع مرغوب) هتخليهم أكثر حب للحوم ولما يصدقوا يخروجوا بره البيت عشان ياكلوها ,طيب لما ابنك/بنتك شافت كل أصحابها بياكلوا لحوم وفراخ وقالتك عايزة كوكو ياترى لو أديتها مشروم كبديل هتسكت وتقتنع !!حتى لو قررت تسيبيهم لما يكبروا ياخدوا القرار براحتهم طيب هتعملى كده ازاى ومفيش أى لحوم بتتعمل أو بتدخل في البيت, الموضوع صعب جدا والكلام فيه كتير ومش لاقيه حل مثالى في النقطة ديه وده بقى في حالة ان الأم والأب الاتنين أصلا نباتين لأن لو واحد فيهم بس اللى نباتى هنا الموضوع أصبح أكثر تعقيدا .
4-الحيوانات أصدقائي ..وأنا لاآكل أصدقائي
طبعا طول الوقت هتعقد ترد لا هتبرر لاهتستحمل سخرية الفضولين من الأهل والأصدقاء , هو انت ليه نباتى ؟يعنى ازاى متكلش لحمة يعنى زينا؟ طب وعايش ازاى من غير لحمة وبتاكل ايه ان شاء الله على كده بقى؟! ومن قال ان ده صحى وأفضل! مانا عايش اهو من زمان وباكل أطنان من اللحمة وعايش زاى الفل أهوه ! وبعدين احنا لومقتلناش الحيوانات هتقعد تعمل ايه يعنى هتودى عيلها المدرسة مثلا؟! انت هتكفر ياعم ولا أيه ده ربنا قال أذبحوا بقرة؟ وهنعمل ايه بقى فى العيد الكبير لما نبقى نباتين يتلغى مثلا !؟ الأفضل انك متدخلش في مناقشات من النوع ده وابتسم.
5-ولا تعزمنى ولاأعزمك
تقريبا محدش هيجى يتغدى عندك ولاهتروحى تتغدى عند حد ألا لو عامل مكرونة وهترتاحى من عزومات رمضان الكتير وتعبها ومن زيارات الأهل أو الأصدقاء الغير مرغوب فيهم,لأن محدش هيجى يتغدى عندك الأكلات الغريبة اللى بتاكليها دي من وجهة نظرهم وانتى لو اتعزمتى مش هتلاقى حاجة تاكليها على السفرة الغير ملائمة بتاتا للنباتين أمثالك.
