الازدواجية عموما صفة سيئة ومكروهة, ولكن بالرغم من كده هي صفة منتشرة جدا في مصر .. وبالذات بين الذكور
عقلية الذكر المصري اصبحت متبرمجمة علي مفاهيم ومعايير في قمة الازدواجية كانها هي دي طبيعة الحياة وكان الكيل بمكيالين والحكم بمعايير مختلفة هو الطريقة الصحيحة للتفكير
هنا هنستعرض اشهر 5 مظاهر للازدواجية في حياة الذكور المصريين
1 ” انا عايز اكون كلب تحت رجليكي “
النموذج الاشهر واللي اصبح مادة للسخرية علي مواقع التواصل الاجتماعي, مؤخرا بعض البنات بقوا بياخدوا سكرين شوت لرسايل بتيجي علي الOther علي الفيسبوك و ينشروها لاصدقائهم ومتابعينهم؛ الرسايل دي بتحتوي اغلبها علي عبارات تحرش صريح او ابداء رغبات منحرفة من اشخاص بيكتبوا ادعية واذكار او ايات واحاديث ليل نهار في العلن وتبقي مش قادر تفهم ازاي نفس الشخص ممكن يطلع منه الكلام ده والكلام ده
2 ” لماذا لا ترضاه لاختك “
مش بنتكلم هنا عن امور معقدة زي الحق في المواعدة او الحب او علاقات سواء ناجحة او فاشلة واشياء بيعتبرها الذكر انها حق طبيعي ليه وللبنت اللي بيعرفها لكن ممنوع اخته تعمل كده
لأ احنا بنتكلم عن بديهيات زي الشغل والسفر وحريات اساسية زي حقها انها تحط صورتها علي الفيسبوك مثلا اللي طبيعي جدا ان ذكر مصري يرضاه لنفسه لكن لا يرضاه لاخته
3 ” الماضي مهم فقط عندما يكون الباسبور اخضر “
بيهتم الذكر المصري بماضي شريكة حياته ويدقق في البحث والتمحيص والمراجعة لكل احداث ماضيها وكل العلاقات السابقة اللي عاشتها طبعا لو كانت شريكة حياته دي مصرية زيه
انما لو كانت من حملة الباسبورات الاجنبية ساعتها كل شئ بيختلف والماضي بيتنسي واحنا ولاد النهاردة
4 ” لو حلال ادينا بنشربه ولو حرام ادينا بنحرقه “
يختلف المصريين عموما مش بس الذكور في تحليل وتحريم انواع معينة من المخدرات والمكيفات فمثلا البعض بيعتبر الحشيش حلال ولكن الكوكايين حرام او الترامادول حلال لكن الكحوليات حرام اكيد مع ان لو نظرنا لتاثير معظم المكيفات دي هنلاقيه متشابه لدرجة كبيرة بس كل واحد بيحلل اللي بيحب طعمه
5 ” انا عايز ده طبيعي.. انتي عايزة دي سفالة “
يعتقد معظم الذكور المصريين ان الرغبة الجنسية محصورة علي الذكور بشكل عام .. واذا ابدت الانثي رغبتها او تحدثت عنها حتي فهي اكيد سافلة مش متربية .. ازاي تفكر في حاجه مخلوقين بيها كده!
