كلنا بنحب الحيوانات الأليفة، كلنا نفسنا يبقي عندنا ف البيت سلحفاة، قطة، كلب، عصفورة، أي حاجة متحركة وحية غير بني البشر المزعجين، طبعا شفت فيلم “طير انت” لما أحمد مكي كان بيقول “عمرك شفت كلب بلدي اتجوز كلبة ألماني عشان ياخد الجنسية؟” أكيد لأ، ولأن عالم الحيوانات هو عالم فطري جميل، فكلنا بشكل أو بآخر بنحبهم، بس قلة قليلة مندسة مننا بيبقي عندهم الشجاعة انهم ياخدو القرار ويكونو مسئولين عن حيوان مسكين، سواء قطة أو كان كلب، ويضمهم لعيلته، ويبقي ناضج كفاية انه يرعاهم ويحبهم..! النهاردة حابين نستعرض معاكم أنواع صحاب الحيوانات الأليفة، يلا نستكشف مع بعض؟ يلا..!
1- هريدي
ايه ده هي السمكة ماتت ليه؟ دنا حاططلها أكل من أسبوعين..! ايه ده هو الكلاب لازم تتمشي علي الأقل كل يومين؟ متأكدين يا دي عينة من نوع “هريدي” المسقط دائما، هريدي ده غالبا مبيكونش مهتم من الأساس بأي حيوان أليف او طائر عنده، غالبا جماعة ان القطة كدة ميتة مش نايمة..! البوي فريند/الجيرل فريند جابتهوله هدية، بالتالي هو بيرميه ومسقطه تماما ومبيتأثرش بيه لو حصله أي حاجة… لو عندك صاحب زي هريدي تجنب انك تجيبله حيوانات أو كائنات حية هدية، بالكتير تجيب له دبدوب، وهيرميه بردو، لأنه مسقط..!
2- الديكتاتور
وده صاحب أصغر دماغ ممكن تقابله ف حياتك، بيعمل عقله بعقل الPet بتاعه، فلو مثلا اكتشف ان الكلب بتاعه مبيحبش ياكل حاجة معينة، هيفضل يحطهاله لحد ما الكلب يرضخ وياكلها، او يموت م الجوع، عادة ما بيقعد يهزأ ف الPet لو عمل حاجة غلط، وممكن يبقي عنيف ويمد ايده عليه، وهكذا، كنت أعرف قبل كدة واحدة كانت بتقف كل يوم الصبح تتخانق مع القطة بتاعتها عشان بتعض ف الجزم بتاعتها، وتضربها وهكذا، ربنا يشفي.. لو عندك صاحب مجنون زي ده، حاول تديله حقنة منومة وتاخد منه الكائن الأليف المسكين ده..!
3- مجنون السيلفي
محدث/محدثة السلافي مع الحيوان الأليف، مبدأيا كدة لو قطة هتسميها “بوسي” ولو كلب هتسميه “ركس” وهتقعد تتصور معاه/معاها كل شوية لدرجة تزهق، شوية ف النادي، شوية ف البيت، شوية ف البلكونة، شوية ف البحر، ف أي مكان، لدرجة انها ممكن تصحي الحيوان م النوم عشان تتصور معاه، مش مهم الحيوان يرتاح المهم عندي ألم لايكات يا نصة 😀 صاحبتك أو صاحبك ده حاول تعمله Unfollow حفاظا علي مرارتك وارتفاع ضغطك وعلي سلامة صحتك العامة..!
4- معلومة لله
ده واحد/واحدة معداش علي سنة أولي جوجل، غالبا لو في تويتر بتلاقيه يدخل يسأل علي “مفيش هنا طبيب بيطري يا جماعة؟” وبيسأل أسئلة من نوعية “هي العصافير ممكن تاكل عيش فينو يا جماعة؟ وهكذا، كل ما تقف قدامه حاجة بيجري يسأل كل الناس عليها، مفكرش مرة ربنا يكرمه ويفتح جوجل عشان يعرف المعلومة دي من مصادر موثقة، بالتالي أي حد بيفتي ممكن يبعته ويخليه يعمل حاجات غلط عشان البيه مكسل يسيرش..! تاني مرة صاحبتك/صاحبك ده يقابلك حاول تقوله Read the fucking Manual بعد كدة عشان متقرفنيش..!
