تقريبا احنا الشعب الوحيد اللى في العالم اللى بيستخدم كليشهات عشان يهرب من أى حاجة مش هيعملها,وفى نفس الوقت  لما الجمل دي بتتقاله بيصدقها, ودي بعض الكليشهات اللى بنقولها على سبيل ال”ولا حاجة”وبنصدقها عادى، أو كما قال فريد شوقى لـ زكي رستم في جملته الخالدة ده انا عاملها قبل منك
  • ان شاء الله = ابقي اقابلني

img_1377792304_262

دي بقى الجملة الساحرة اللى بترد بيها على أي سؤال مش عايز تجاوب عليه بنعم أو لا, وبتدي كل الاحتمالات وكل التوقعات وهي مش إجابة بس بتبان إجابة, فإن شاء  الله خير.
  • الويك إند اللى جاي.. هبقي في الساحل

ابقى-قابلني

دول بقى مجموعة من البشر المترددين اللى مش بيكونواعارفين هما عايزين أيه ولا هيعملوا أيه,ولا هيرحوا فين, فتقولهم أي حاجة يقولك الويك أند اللي جاي،هو بس عايز يدي لنفسه مساحة للتفكير، بس في الأخر بيستسلم لرغباته في الأنتخة، وكل “ويك” بتفكر ت”إند” معاه.
  • ربنا يسهل أو يدينا ويديك طولة العمر

2015_1419201916_317

أول ما تتزنق قول ربنا يسهل، فيه مشكلة ومش قادر تواجه ربنا يسهل هتتحل، غرقان في حوار وعايز تقفل ومش فاضى، ربنا يسهل وفكك منى الساعة دي الله يباركلك، صاحبتك مصرة علي خروجة، حبيبتي ربنا يسهل هنخرج.
  • خمس دقايق من بتوعنا

ahmed

5 دقايق وابقى عندك؟ كام مرة سمعت الجملة دي في حياتك,عارف فيه كام 5 دقايق في حياتنا اتحولوا ساعات، مفكرتش مرة ان ال5 دقايق دول يدوبك 300 ثانية!! طب كام مرة كنت في البيت  ومتحركتش من مكانك وقدامك فى الطريق مش أقل من ساعة وقولت خمس دقايق
  • المناسبات السعيدة

216710_dreambox-sat.com

في اي مناسبة هتلاقي أي حد يكلمك يقولك بعدها، بعد العيد إن شاء الله، بعد رأس السنة، بعد عيد ميلاد توتا والشلة، الجمل دي بقى خاصة بمحبين التسويف والتأجيل الناس اللى لما يصدقوا يتشعبطوا فى أى مناسبة عشان يأجلوا أى حاجة المفروض يعملوها، وبالمناسبة دول اكتر ناس عمرهم ما احتفلوا بأي مناسبة أصلا.
  • بكرة

bnatsoft.com144390321934

كدبة واضحة، بكرة، أنت مصدق أن فيه شخص بيقول بكرة وبينفذ، ما كل يوم بيجي بيبقي بكرة، كسالى العالم لما اتحدوا وقرروا يعملوا يوم عالمي للكسل، عارف تاريخ اليوم دا ايه.. بكرة!.
  • صدقنى

CiXhxXyWgAAYnKu

 اي شخص يبدأ كلامه بصدقنى، سد ودنك بيقول أى حاجة، مفيش اى نسبة ضئيلة من  الصدق،صدقني دول عالم متتصدقش.
 
  • مكنتش سامع الموبايل & أرقامي كلها ضاعت

bnatsoft.com1443903218761

كل اللي فاتت ممكن نسامح فيه عادى ونصدقه عادى حتى لو اتكرار لملايين المرات  إلا الجملة دي مش ممكن حد مبيسمعش موبايله، إللى فيه الواتساب والانستجرام والفيسبوك، يعني انت عايز تفهمني انك مش سامع الموبايل اللي قاعد بتشييت فيه، وبوز البطة، واللايكات الطايرة يمين وشمال، طب اقولها وانت مش أكتف ناو.

 

  • انا على الكوبرى.. أنا من بنها

xxx188

مفيش كوبري في مصر سالك…قاعدة عامة؛ الجملة دي لما بتتقال بتفقد قدرتك على التصرف أمشى ولاأستنى, طب أخد ريكييشن وأتخانق معاه ولا أعذره, المشكلة أني احنا لما بنتزنق بنقول أننا علي الكوبري.