في بطولتها المطلقة الأولى، إنجي المقدم بتقدم أداء استثنائي في مسلسل قواعد الطلاق الـ 45، اللي بيسلط الضوء على قضية مهمة، بيكون ضحيتها كتير من الأطفال، وهي الطلاق، عشان كده، في المقال ده هنتكلم عن المسلسل وعلاقته بانفصال والدي إنجي المقدم، وإزاي يتم الانفصال بطريقة شيك متأثرش على الأطفال.
قواعد الطلاق الـ 45
مسلسل “قواعد الطلاق الـ 45″، مأخوذ عن المسلسل الأمريكي “جيرل فريندس جايد تو ديفورس”، واللي تم عرضه في الفترة من 2014 لـ 2018 على خمس أجزاء. مسلسل “قواعد الطلاق الـ 45” بطولة إنجي المقدم وعمر الشناوي وهيدي كرم وسالي شاهين وصدقي صخر وجيهان الشماشرجي وإخراج مصطفى أبو سيف، وبتدور أحداثه في 45 حلقة.
وعن المسلسل قالت الفنانة إنجي المقدم إن شخصية الست المطلقة اللي بتجسدها، في مسلسل قواعد الطلاق الـ 45، عاشتها بالفعل خلال حياتها، في فترة الطفولة بين والدها ووالدتها، فكانت العلاقة مبنية على الرقي والاحترام بعد الانفصال.
وأوضحت:”والدي كان بيجي عندنا البيت وكانوا أصحاب جدًا هو ووالدتي بعد فترة الانفصال، والنموذج ده اتربيت فيه وعشته، وكنت متحمسة للمشاركة في المسلسل لإظهار إن في علاقات محترمة بتنتهي بشكل جميل وراقي، وإن في ناس كده بتنتهي علاقتهم بالشكل ده وموجودين في مجتمعنا”.
معضلات الطلاق الثلاثة
في معظم حالات الطلاق بيكون في 3 معضلات رئيسية يواجهها الأزواج، وهم:
عدم التأكد من صحة القرار
نظرًا لأن الطلاق يؤثر على الأطفال، وعلى اللايف استايل بتاعك وعلى حياتك الاجتماعية أو الاقتصادية، فبيكون في ضغط كبير وقت اتخاذ القرار. ولسوء الحظ، مفيش أي ضمانات، وأفضل حاجة ممكن تعملها إنك تاخد القرار ده بدون الرجوع لقلبك (العاطفة)، ويكون قرار ك مبني على العقل بشكل أكبر.
الطرف التاني هو اللي عايز طلاق
واحدة من أكبر معضلات الطلاق، هي أن يكون طرف واحد هو اللي عايز الطلاق، والطرف التاني العكس، وفي العادة، بيكون لده نتيجة سيئة على حياتك، لأن حياتك هتتغير من غير ما يكون لك رأي في ده. وعشان تقدر تواجه المعضلة دي، محتاج تتأكد إن علاقتك بشريكك بعد الطلاق تكون كويسة ومفيهاش أي (ضغينة).
مش قادر تتحمل مسؤولية الطلاق
أما آخر معضلة للطلاق، هي إنك متكونش قادر تتحمل المسؤولية، وعايز شريكك هو اللي يتحمل مسؤولية الطلاق. ويعتبر الطلاق الناتج عن عن المعضلة دي، من أسوأ النتايج اللي ممكن يحصل، لأنه بيكون نتيجته قلق وصراعات بشكل مستمر.
خلينا نتفق إن العنصر المشترك بين المعضلات الثلاثة هو الخوف، في الأولى انت بتخاف من انك تاخد قرار غلط، والتانية بتحاول تنكر إن في مشاكل من الأساس، أما التالتة، فأنت عايز الطلاق ولكن خايف انك تكون ملام في اللي حصل، عشان كده عايز الطرف التاني هو اللي ياخد القرار.
وعلى الرغم إن الطلاق تجربة عاطفية بامتياز، إلا إن ممكن يكون الطلاق ده بشكل متحضر، في السطور الجاية هنتكلم عن نصايح تساعد إن الطلاق يتم بشكل شيك.
نصائح للانفصال بطريقة شيك
تجنب المحاكم
لو ده ممكن، احنا بننصح بتجنب المحاكم لأكتر من سبب أهمهم أن دايمًا بيكون للمحاكم تأثير سلبي على العلاقة بعد الطلاق، عشان كده لو أمكن تحاول تبعد عن ده، ولو في مشكلات متعلقة بالنفقة وغيرها، حاول تحلها بشكل ودي، عشان علاقتكم تستمر بعد الطلاق كأصحاب.
متعاملش شريكك كعدو
للأسف، كتير من علاقات الطلاق بيكون نتيجتها إن كل طرف بيعامل التاني كعدو ليه، وبيحاول ميخليهوش يشوف الأطفال، أو ياخد منه أكبر قدر من الاستفادات، ويبدأ يحسس الطرف التاني بأنه خسر أحلى حاجة في حياته، وده بيكون ليه نتيجة سلبية على الأطفال، لو كان في أطفال بينكم.
عشان كده، احنا بننصح، بأنك متتعاملش مع الطرف التاني كعدو، خلي الجواز مجرد تجربة مريت بيها، في حاجات كويسة حصلت وحاجات وحشة، لكن على أي حال متحطش الطرف التاني في خانة العدو.
متدخلش الأطفال في الطلاق
تالت حاجة بننصح بيها هي إنك تحاول تبعد الأطفال عن عملية الطلاق، وده بيكون بأكثر من حاجة:
1- متطلعش زعلك على أطفالك
2- متتكلمش مع أطفالك عن المشكلة اللي بتعاني منها.
3- متتكلمش بشكل سيء عن شريكك السابق قدام الأطفال.
4- متبعدش الأطفال عن شريكك السابق.
5- متتخانقش مع شريكك السابق قدامهم.
6- قول للأطفال عن الطلاق بعد الانتهاء من الطلاق.
وعليه، عايزين نقول إن من المهم طلاقك من شريكك السابق، ميكونش ليه أثر عليهم، لأن طلاقكم ممكن يأثر بشكل سلبي عليهم، عشان كده لازم متخليش ده يأثر على نفسيتهم.
في النهاية، عايزين نقول، إن المسلسلات اللي بتتكلم عن قضايا اجتماعية، زي قواعد الطلاق الـ 45، ليها أهمية كبيرة، لأن الفن دوره إنه يتكلم عن الواقع الموجود، والمسلسل قدر يقدم مثال جيد للطلاق القايم على الاحترام والرقي.
