أول شئ بتهتم بيه البنت وبتعتبره جزء كبير من جمالها هو شعرها؛ وحرصها انه يفضل شكله صحى وجذاب طول السنة لكن مع قدوم الشتاء بالهواء البارد والرطوبة بيسببوا أضرار كتير للشعر وده بسبب قلة الزيوت الطبيعية والدهون اللى بتفرزها فروة الشعر فى فصل الشتاء فتغذيته بتكون ضعيفة جدا وبالتالى بيعانى الشعر من الجفاف والتقصف والهيشان؛ وبيتطلب الكثير من الوقت والمجهود للأعتناء بيه فى هذا الفصل القاسى على الشعر.
هنستعرض هنا بعض النصائح اللى هتتغلبى بيها على جفاف الشعر فى فصل الشتاء من غير مايفقد النعومة والجاذبية
1- مش كل يوم ميه وشامبو:
بما ان زيوت الشعر بتكون ضعيفة جدا فى الشتاء فمفيش داعى لغسيل الشعر يوميا؛ فالأفضل غسله مرتين فقط فى الأسبوع ليصبح نظفيا ولايزداد جفافا؛ والتقليل من أستخدام الشامبو لأنه بيزود جفاف الشعر حتى لو نوعه جيد وغالى الثمن؛ فاستبدليه فى المرة الأولى بغسله بالبلسم اوحمام الكريم فقط وفى المرة الثانية استخدمى حمام زيت قبل غسله بالشامبو.
2-بلاش سشوار ومكواة:
من الحاجات اللى بتخلى الشعر أكثر هيشان وتقصف هو الأفراط فى استخدام السشوار والمكواه وخصوصا فى فصل الشتاء اللى بيكون فيه الشعر فى أضعف حالته فقللى استخدامهم على أد ماتقدرى وخليهم فى المناسبات بس؛ وهيكون فرصة رائعة لراحة الشعر من شد وسخونية الاسشوار وهيبدو طبيعي أكثر.
3-ماسكات طبيعة وزيوت :
لو كنتى بتعمل ماسك أو حمام زيت واحد فقط فى الأسبوع ففى الشتاء هتعمليه من مرتين لثلاث مرات مع الحرص على أختيار الزيوت والماسكات المناسبة لنوع شعرك أذا كان دهنى أوجاف أوعادى …
4-أكلات مهمة للشعر:
من المستحيل الأهتمام بالشعر خارجيا وأهماله داخليا فالشعر الصحى فى الجسمى الصحى فلازم وجباتك الأساسية تعتمد على الأكلات الصحية من خضروات وفواكه والاكثار من أكل الحمضيات والأسماك واكل بعض الأطعمة اللى بيها دهون وزيوت طبيعية -لتعويض مايفقده الشعر من زيوته فترة الشتاء- مثل القشدة والمكسرات دون أسراف والتركيز على الاكلات اللى بتحتوى على فيتامينات ( A,E,B,C) للأهميتهم الفائقة للشعر.
5-ماء فاتر :
الميه الساخنة بتضر الشعر أكثر مابتفيده وخصوصا فى الشتاء لأنها بتشيل كل الدهون والزيوت الطبيعية اللى فى الشعر وتتركه أشد جفافا؛ وايضا بتزود قشرة الشعر لمن يعانون من مشاكل القشرة؛ ولصعوبة غسله بالماء البارد فى الشتاء فغسليه بالماء الدافئ قليلا.
6-الصبغة:
يفضل عدم صبغ الشعر فى فترة الشتاء لما تحتوى عليه الصبغة من مواد كيميائية مضرة للشعر وتجعله أكثر جفاف , ولو كنتى من الأشخاص الصعب أستغنائهم عن الصبغة لفترة طويلة ممكن تستخدمى الحنه الطبيعية الغير مضاف ليها اى مواد كيميائية ولو كنتى لاتفضلى الحنه مثلى؛ ممكن تستخدمى صبغة بدون أمونيا هتكون أقل ضرراً للشعر
7- شعرك مثلك يشعر أحيانا بالملل :
مع مرور الوقت الشعر بيتعود على نوع الشامبو والبلسم وحمام الكريم اللى بتسخدميه وبيملهم ومش هيدوكى تأثيرهم المطلوب على الشعر كما فى السابق؛ فالثبات على نوع مستحضر واحد لفترة طويلة فكره غير صائبة؛ فمع بداية الشتاء هتكون فرصة جيدة لتغير كل مستحضرات الشعر مع الحرص على أختيار مستحضرات مناسبة للشتاء تحتوى على الكثير من الزيوت واعتماد المنتجات على مواد طبيعية أكثر.
8-أشربى مايه كتير:
فوايد شرب المياة لاحصر لها؛ فمتهمليش الماية فى الشتاء واشربها بستمرار وعلى مدار اليوم هتساعدك فى ترطيب شعرك ونضارة بشرتك كمان.
9-قصى شعرك:
من أهم الأشياء قبل الأعتناء بالشعر والحفاظ عليه هو قص أطرافه؛ فأطراف الشعر هى أول شئ بيتعرض للتقصف والتكسر وبيعكس مظهره على الشعر كله فبتدى بقص أطرافة مع بداية الشتاء
10- التدليك .. والتمشيط .. والترطيب
وأخيرا سرحى شعرك أكتر من مره فى اليوم عشان تجددى الدورة الدموية فيه بس بلاش تسرحيه وهو مبلل عشان متعرضهوش للتقصف؛ واستخدمى فرشاه خفيفة على الشعر او مشط خشبى عشان تتجنبى شد الشعر؛ دلكى شعرك عدة دقائق بزيوت مرطبة كلما سنحت لكى الفرصة هتساعدك على الأسترخاء وتدفق الدماء لفروة الرأس؛ استخدمى كريمات التنعيم وسيرم مناسب لترطيب شعرك فى فصل الشتاء