صعب جداً في الزمن ده إنك تلاقي راجل مخلص بطبعه، لإن الخيانة صفة أساسية بيتصف بيها كتير من الرجالة، مبررين لنفسهم ده بإنه نتيجة طبيعية لتقصير شريكة حياتهم فى حقوقهم وانشغالها عنهم طول الوقت، أو لأنهم لقوا اللي مش لاقينه فى حياتهم معاها مع واحدة تانية، وعشان تتجنبي كل ده وتخلي حبيبك يبقى معاكي دايما وميقدرش في يوم من الأيام يخونك أو يستغنى عنك، هنقولك على شوية خطوات كدة تعمليها..
1-خليكى دايماً جنبه وادعميه طول الوقت
الراجل عامل زي الطفل الصغير اللي ميقدرش يستغنى عن امه، ودي نقطة مهمة جداً لازم تستغليها بإنك تفضلي جنبه طول الوقت وخصوصاً لما تحسي إنه ضعيف ومحتاجلك، ولما يكون عنده مشكلة حاولي تسمعيه باهتمام وقدميله الدعم وحسسيه إنك معاه على الحلوة والمرة، وبكدة تبقي نفذتي نقطة من اهم النقط اللي تخليكي اول واحدة يجري عليها لما يحس بالضعف.
2-اتعاملى معاه بذكاء وخصوصاً فى المشاكل
الذكاء صفة ضرورية جداً لازم تتعاملي بيها معاه، وخصوصاً فى المشكلات، يعني مينفعش يجي يحكيلك على حاجة من نفسه فا تتضايقي وتقفشي وتفضلي تلوميه وتأنبيه بشكل يندمه اصلا على إنه فكر يحكيلك، خليكي هادية واتصرفي بحكمة واتناقشي معاه في اللي مضايقك لحد ما تحلوا المشكلة سوا، وبعد كدة اقفلوا الموضوع ومتتكلموش فيه تاني وكإنه محصلش اصلا، لإنك لو فكرتي تفتحي الموضوع تاني تبقي بتعملي من مفيش.
3- اديله مساحة من الخصوصية
بمعنى تاني “متخنقيهوش”، اديله مساحة أمنة يتحرك فيها ويحس إنه حر وعنده شوية خصوصية، وده لإن الغيرة الشديدة وحب التملك هيولدوا جواه طاقة عند كفيلة تخليه يعمل الغلط حتى لو مكانش ناوي يعمله، فمتكونيش بقى انتي قوية ومفترية عشان ميزهقش ويهرب منك وتبقي لا طولتي بلح الشام ولا عنب اليمن.
4- احترميه فى غيابه قبل حضوره
الراجل مبيحبش البنت اللي تقل منه أو تخلي شكله وحش سواء قدام اصحابه أو قرايبه، وعشان كدة لازم تاخدي بالك كويس قوي من النقطة دي لان شكلك من شكله وقيمتك بتستمديها من قيمته، ومش بس في وجوده، لأ ده كمان في غيابه، متحاوليش باي تصرف مهما إن كان إنك تقلي منه.
5- اهتمى بيه وبالحاجات اللى بيحبها
