كل الستات حلوين دي حقيقة، لكن هل الجمال ليه مقاييس محددة. يعني هل الجمال سمار ولا بياض، تخن ولا رفع، شعر أصفر ولا أسود، طول ولا قصر. ولا الجمال جمال الروح ؟ في الفترة الأخيرة فيه ناس كتير بتتكلم إن الست ذات القوام الممتليء هي الأجمل. وظهر عارضات أزياء أتخن من العارضات المثاليات. وظهرت حملات لحب الجسم زي ما هو. سبب انتشار الحملات دي كان تزايد الضغوط على الستات بشكل عام لمجاراة الموضة وإصابة العديد من المراهقات بأمراض نفسية زي مرض فقدان الشهية. في إبريل 2015 أصدرت فرنسا قانون بحظر توظيف عارضات الأزياء النحيفات جداً وفرضت غرامات وعقوبات قد تصل للحبس لوكلاء شركات الموضة اللي هيخالفوا القانون دا.
“البيج سايز مودلينج” أو فكرة عارضات الأزياء ممتلئات القوام مش حاجة طالعة من فترة قريبة، والوضوع غير مرتبط بظهرور محلات الهدوم الأحجام الكبيرة. الأماكن اللي بتبيع لبس بمقاسات كبيرة موجودة من زمان جداً. لكن أول من أدخل فكرة عارضات الأزياء البدينات كانت خبيرة فاشون أمريكية اسمها “Mary Duffy”. ماري عملت أول وكالة للعارضات ممتلئات القوام وسمتها ” Big Beauties/Little Women” سنة 1979
أصحاب صناعة البيج سايز مودلينج دايماً في صراع كبير، وبيواجهوا تهم تخص الترويج للبدانة والمرض، واستغلال رغبة الستات في التصالح مع جسمهم. لكن أصحاب شركات الأزياء بيردوا إن مقاسات عارضات الأزياء المثالية مبتعبرش عن جموع الستات، فمتوسط مقاس الستات في دول كتير “14” بالمقاييس الإنجليزية أو ما يعادل مقاس لارج، في حين إن مقاس عارضات الأزياء العاديين بيتراوح بين مقاس “8” أو “10”. ورداً على إن صناعة “البيج سايز مودلينج” بتروج للأمراض، بنلاقي إن أغلب عارضات أزياء الملابس بالأحجام الكبيرة بيخلوا بالهم من أكلهم كويس جداً وبيمارسوا التمرينات الرياضية باستمرار، مبيتبعوش دايت بالمعنى الحرفي لكنهم بيخلوا بالهم وبيحافظوا على قوامهم من الترهلات.
لكن بتظل المشكلة إن شكل عارضات الأزياء للمقاسات الكبيرة بيختلف عن الستات العادية حتى لو نفس الوزن والمقاس، لكن على الجانب الآخر الإختلاف دا بردو موجود بالنسبة للعارضات العاديات والستات الأقل وزناً.
ودول أشهر عارضات أزياء المقاسات الكبيرة
Tess Holliday
اشتهرت تيس هوليداي أو ” ريان هوفين” – اسمها الحقيقي- بإنها أتخن عارضة أزياء في العالم. تيس وزنها حوالي 130. تيس اشتغلت ماكيرة واستايلست ومصففة شعر. وفي 2011 عملت تيس كعارضة مع شركة Torrid للملابس و مع سلسلة محلات A&E. في 2013 وفي نقلة لحياة تيس، عملت حملة على الإنستجرام اسمها “effyourbeautystandards#” والحملة كان هدفها إن كل الستات تحط صورها أياً كان شكل جسمهم للتغلب على فكرة قوالب الشكل. وصل عدد الفولورز لحملة تيس لأكتر من نص مليون لحد ما نجحت تيس توقع عقد مع وكالة Milk للموضة.
تيس اتهاجمت كتير لإنها بتدعو للسمنة المفرطة. وردت على دا إنها عانت كتير في حياتها بسبب وزنها، وإنها حاولت كتير قبل كدا تخس وفشلت، لحد ما وصلت لنقطة إنها بتحب جسمها. وشبهت تيس اللي بيطالبوها بإنقاص وزنها باللي بيطلب من شخص أسمر البشرة تغيير لونه.
Fluvia Lacerda