كل حاجه في الدنيا بتتغير خصوصا ذوق الناس لبسهم وشعرهم وتفكيرهم حتي طريقة تقيمهم لنسبة الجمال , يعني الي كان زمان بيملي العين مبقاش حد بيشوفه حلو دلوقتي , بس في العادي المفروض كل حاجه بتبقي اجمل بس الذوق العام بقي فيه حاجه غلط مش مفهومه ولا متفسره ابدا ..
الرقة :
مفهوم الرقة عند الناس اتغير خالص يعني بعد ما كان الطبع الهادي والطريقه الشيك في الكلام والردود اللبقة , بقت الرقة هي مدي مقدرة البنت انها تسرسع في صوتها وتعوج بوقها في الكلام وتحط مش قبل كلامها ” مش اعرف , مش افهم , مش اكل ” لغه غريبه جدا ومنتشرة بين اوساط الرقاق الجُدد , ده غير طبعا موضة كائن الباندا والحلوة بزيادة والكلام الي ملوش اي محل من الاعراب ده , معرفش طريقة الكلام دي انتشرت امتي ولا ازاي وهل هي مكمله معانا كتير ولا وقت وهتنتهي ..
الرجولة :
علي رأي دنيا سمير غانم الرجولة قلب ومواقف , امتي بقي تحديدا اتحولت من قلب ومواقف للبس وعضلات وسمانه ودقن وتفاحة ادم , بقي القميص النبيتي والبنطلون الكافيه هما الي بيحددوا ان كان الي معاكي راجل ولا مجرد ” ذكر ” زي ما بطاقته بتقول , الشباب بينهم وبين بعضهم بعد ما كانوا بيحترموا زمايلهم واصحابهم بقوا بيراهنوا بعض مين هيعرف يوقع الحلوة الي في الشلة
الاعجاب والحب :
الموضوع ده تحديدا شائك طبعا بس باختصار بعد ما كان الحب سند وضهر وفرحة وكده , بقت مسألة تبادل منفعة هو بيدور علي الحلوة الي تبينه عرف يختار ويفضل الناس يحسدوه علي الامورة الي في الرايحة والجاية معاه , مقابل بقي هو هيعملي ايه هيخطبني فأغيظ بنت خالتي او هيجبلي بوكس شوكولاته ويقعد يقولي علي الفيسبوك كلام حلو اغيظ بيه صحابي او تاخده سلمه توصل بيه لحاجه محتاجاها ومش هتتحقق الا بيه , الموضوع بقي بيزنس مش مشاعر وعلاقة لطيفة بين اتنين
السوشال ميديا :
بعد ما كان الناس بتعمل لايك بس علي الحاجه الي عجباهم او لفتت انتباههم , بقوا بيعملوا لايك علي اي حاجه ومش بس كده لا ده يبقوا لسه شاتمين بعض وتلاقيهم داخلين يحبوا في بعض علي الكومنتات وفي الي بيكتب ادعية وكلام ديني عشان ياخد لايكس اكتر , غير بقي الناس الي طول الوقت بيكتبوا كل تحركاتهم في الحياه وفي الاخر يقولوا اصل الناس حاطة عينهم علي حياتنا , لا انتوا الي حاطين حياتكم مشاع مع شعب فضولي وجميل زي ده اكيد الي مبيركزش محتمل جدا يركز في حياتكم , الناس سابت الواقع وقعدت جوا السوشال ميديا مش بتقربهم لا دي اغلب الوقت بتعزلهم وتاخدهم من بعض …
الحقيقه مش كل الناس كده بس للأسف ده بقي الشكل السائد والغالب علي الناس , كل حاجه اتغيرت حتي الذوق العام مصاب بنفس حاله التغيير دي , ربنا يستر وميتغيرش اكتر من كده ..
